Türkiyənin Kastamonu və Samsun vilayətlərində iki dron aşkarlanıb.

Pressline.az xəbər verir ki, bu barədə İHA agentliyi məlumat yayıb.

Bildirilib ki, 200 kq ağırlığında dronlardan biri Kastamonuda Kuşkayası kəndində bağ ərazisinə düşüb və yanıb.

Digər aparat isə Samsunun Karataş rayonunda yerli əhali tərəfindən tapılıb və bu barədə jandarmaya məlumat verilib. Bundan sonra müvafiq orqanları ərazini mühasirəyə alıb, giriş-çıxışı bağlayıb.

DHA agentliyi isə iddia edir ki, Karataşda tapılan PUA-nın mühərrikinin yoxlanılmasına əsaslanan ilkin qiymətləndirmələrə görə, bu, Ukrayna istehsalı olan kamikadze dronu ola bilər.

Xankəndidə kafedə insident olub.

Hadisə şəhər ərazisində yerləşən “Kafe 014” adlı obyektdə qeydə alınıb.

Tərtib olunan protokola əsasən 28 yaşlı Faiq Baxışov və 23 yaşlı Tacir Quliyev (ad və soyadlar şərti) gecə saat 1 radələrində həmin kafedə yeyib-içdikdən sonra aralarında mübahisə yaranıb. Mübahisə zamanı onlar sərxoş olduqları üçün nalayiq ifadələr işlədiblər və dostlardan biri bəzi əşyaları sındırıb.

Ərazidə xidmətdə olan polis əməkdaşları onlara yaxınlaşıb irad bildirsələr də, Tacir qanuni tələbə məhəl qoymayıb. Nəticədə hər iksii saxlanılaraq şöbəyə aparılıblar.

Burada onların barəsində müvafiq maddələrlə protokollar tətbiq olunub.

Məhkəmənin qərarı ilə Faiq 8, Tacir isə 9 gün müddətinə inzibati qaydada həbs olunublar./musavat.com

Özbəkistan Prezidenti Şavkat Mirziyoyev “Korrupsiyaya qarşı mübarizə haqqında” Qanunu imzalayıb.

Pressline.az xəbər verir ki, qanun korrupsiya ilə əlaqəli cinayətlərin siyahısını və korrupsiyaya yol vermiş vəzifəli şəxslərə tətbiq edilən məhdudiyyətləri müəyyən edir.

“Uzun müddətdir gözlənilən və iyunun 22-də imzalanan qanunla korrupsiya cinayətləri siyahısı müəyyən olunub. Bu siyahıya daxil olan cinayətlərdə təqsirli bilinən şəxslər elektron reyestrə daxil ediləcək və onlar məhkumluq müddəti ərzində dövlət işinə qəbul edilməyəcəklər. Reyestrin ictimaiyyət üçün açıq və ya qapalı olması qanunda göstərilməyib”, - yerli medianın məlumatında bildirilib.

Türkiyənin Dənizli vilayətində keçirilən toy mərasimində baş verən silahlı insident nəticəsində 11 nəfər yaralanıb.

Pressline.az Türkiyə mediasına istinadla xəbər verir ki, hadisə Çivril rayonunun Kıralan məhəlləsində qeydə alınıb.

Məlumata görə, 15 yaşlı yeniyetmə gəlini evdən yola salarkən bölgədə adət hesab olunan havaya atəş açmaq istəyib. Lakin tüfəngdən açılan qırmalar yerə dəyərək istiqamətini dəyişib və yaxınlıqda olan qonaqlara dəyib.

Yaralanan 11 nəfər dərhal xəstəxanaya çatdırılıb. 

Hadisədən sonra yeniyetmə ifadə verməsi üçün jandarm bölməsinə aparılıb.

Faktla bağlı cinayət işi açılıb. 

Mingəçevirdə ölümlə nəticələnən dava olub.

Pressline.az Oxu.az-a istinadla xəbər verir ki, hadisə iyunun 22-də gecə saatlarında kafelərdən birinin qarşısında baş verib.

Şəhər sakini, 51 yaşlı Rafiq Məmmədov aralarında yaranmış mübahisə zəminində 35 yaşlı Tural Bəhrəmliyə döyərək xəsarət yetirib. Xəstəxanaya yerləşdirilən T.Bəhrəmli aldığı xəsarətlərdən orada ölüb.

Məlumata görə, Tural Bəhrəmli Rafiqin qızını sevib. Lakin Rafiqin ailəsi qızı ona verməyib. Tural isə sevdiyi qızın qarşısını kəsərək, onu qaçıracağını bildirib.

Həmin gün kafedə ad günü məclisində olan Rafiqə bu barədə məlumat çatıb və o, Turalı kafeyə çağırıb.

Hadisə yerinə gələn Turalla Rafiq arasında mübahisə yaranıb. Mübahisə kafenin qarşısında da davam etdirilib. Nəticədə Rafiq Turalı yumruq və təpik zərbələri ilə ölümcül döyüb.

Hadisəyə ad günündə iştirak edən şəxslər müdaxilə edib və Turalı xəstəxanaya çatdırsalar da, onun həyatını xilas etmək mümkün olmayıb. Tural xəstəxanada dünyasını dəyişib.

Polis əməkdaşlarının keçirdikləri tədbirlərlə Rafiq Məmmədov saxlanılıb.

Fransada hökm sürən isti havaya görə 845 məktəb bağlanacaq.

Pressline.az xəbər verir ki, bu barədə Fransanın meteorologiya xidməti məlumat yayıb.

Bildirilib ki, ölkənin müxtəlif bölgələrində havanın temperaturu 40 dərəcəyə qədər yüksəlib. Məlumata görə, sabah ölkənin 49 departamentdə qırmızı, 40 departamentdə isə narıncı təhlükə xəbərdarlığı elan ediləcək. Fransa Təhsil Nazirliyi həmçinin 1800 məktəbdə dərs saatlarının dəyişdiriləcəyini açıqlayıb.

Qeyd edək ki, ötən ay Fransada rekord həddə çatan isti temperatur və ehtiyatsızlıq səbəbindən 7 nəfər həyatını itirmişdi.

Qətərin Ras Laffan şəhərindəki zavodda partlayış baş verib.

Pressline.az xəbər verir ki. bu barədə Qətərin Daxili İşlər Nazirliyinin məlumat yayıb.

Nazirliyin məlumatına görə, hadisə nəticəsində heç kim xəsarət almayıb. Təhlükəli maddə sızması aşkar edilməyib.

Bundan başqa, paytaxt Dohada da partlayış səsləri eşidilir.