Texniki problemlər istisna olmaqla, bu il TRIPP (Zəngəzur dəhlizi) layihəsinə üzrə tikinti işlərinə başlamağı planlaşdırırıq.

Pressline.az xəbər verir ki, bunu Ermənistanın Baş naziri Nikol Paşinyan iyunun 25-də keçirdiyi brifinqdə Ermənistanın genişmiqyaslı TRIPP infrastruktur layihəsinə inteqrasiyası ilə bağlı şərhində bildirib.

O, hazırda ixtisaslaşmış qrupların birbaşa yerində mühəndislik tədqiqatları apardığı aktiv və hərtərəfli iş prosesinin davam etdiyini vurğulayıb.

“Proses, potensial rabitə marşrutlarının, nəqliyyat qovşaqlarının və elektrik xətlərinin yerində yoxlanılması ilə başlayır. Hazırda müxtəlif mühəndislik, dizayn, layihə, maliyyə və logistika məsələləri demək olar ki, həftəlik, bəlkə də gündəlik müzakirə olunur", - deyə Baş nazir bildirib.

Nikol Paşinyan vurğulayıb ki, bu strateji logistika dəhlizinin inkişafı hazırda hökumət səviyyəsində heç bir maneə ilə üzləşmir.

"Siyasi və ya maliyyə baxımından heç bir maneə yoxdur, lakin sırf texniki və təşkilati məsələlər yarana bilər", - deyə Paşinyan əlavə edib.

Qanunverciliyə “hərbi qulluqçuların şəxsi jetonu” anlayışı daxil edilib.

Pressline.az xəbər verir ki, bu, Prezident İlham Əliyevin təsdiqlədiyi "Hərbi vəzifə və hərbi xidmət haqqında" qanuna dəyişiklikdə əksini tapıb.

Qanuna əsasən, şəxsi jeton həlak olmuş, ölmüş, xəsarət (yaralanma, travma, kontuziya) almış hərbi qulluqçuların şəxsiyyətini müəyyən etmək üçün istifadə edilən, fərdi identifikasiya nömrəsini və qan qrupunu özündə əks etdirən nişandır.

Hərbi qulluqçular hərbi xidmət keçdikləri dövlət orqanları (dövlət orqanının strukturuna daxil olan qurumlar) tərəfindən şəxsi jetonla təmin edilirlər.

Hərbi qulluqçuların şəxsi jetonla təmin edilməsi, həmçinin şəxsi jetonun təsviri, xüsusiyyətləri və uçotunun aparılması qaydası müvafiq icra hakimiyyəti orqanının müəyyən etdiyi orqan (qurum) tərəfindən müəyyən edilir.

Ukrayna Müdafiə Qüvvələri Kinburn burnu üzərində Ukrayna bayrağı qaldırıblar.

Pressline.az xəbər verir ki, bu barədə Ukrayna Silahlı Qüvvələri məlumat yayıb.

Bildirilib ki, güclü zərbələr nəticəsində Ukrayna Müdafiə Qüvvələri Rusiya qoşunlarını tutduqları mövqelərdən geri çəkilməyə məcbur edib. Hazırda sağ qalan şəxsi heyətin təxliyəsi həyata keçirilir və Rusiya qüvvələri müdafiə xətlərini tərk edirlər.

Həmçinin qeyd edilib ki, Ukrayna ordusunun təchizat marşrutlarını kəsməyə yönəlmiş əməliyyatları Rusiya hərbçilərini Nikolayev vilayətində yerləşən Kinburn burnundan tələsik çıxmağa məcbur edib.

Kinburn Qara dəniz və Dnepr-Buq limanına nəzarət baxımından strateji əhəmiyyətə malik ərazidir.

İsrailin milli aviadaşıyıcısı El Al Rusiya və Ukrayna arasında baş verən son hadisələr, eləcə də regionda aviasiya təhlükəsizliyi ilə bağlı insidentlər səbəbindən Təl-Əviv–Moskva marşrutu üzrə uçuşları yaxın günlər üçün dayandırdığını açıqlayıb.

Pressline.az xəbər verir ki, bu barədə “The Times of Israel” məlumat yayıb.

Şirkətin nümayəndəsinin sözlərinə görə, vəziyyət gələn həftə yenidən qiymətləndiriləcək və reyslərin bərpası ilə bağlı qərar veriləcək.

Sərnişinlərə isə qanunvericiliyə uyğun olaraq məlumat veriləcək və alternativ variantlar təklif olunacaq.(

Azərbaycan Suriyada 10 məktəbin yenidən inşası, daha 100-nün bərpasına dəstək verəcək.

Pressline.az xəbər verir ki, bunu Suriya parlamentinin hələbli deputatı Tarık Sulo Cevizci "Körpü" Türkman İrsi Araşdırmaları Mərkəzi İctimai Birliyinin təşkilatçılığı, QHT-lərə Dövlət Dəstəyi Agentliyinin tərəfdaşlığı ilə keçirilən II "Türkman irsi: vətəndaş cəmiyyətlərinin həmrəyliyi" adlı forumda deyib.

Onun sözlərinə görə, Azərbaycan bir çox sahələrdə Suriyanın yanında olub:

"Azərbaycan Suriyada yeni dövrün başlamasından sonra yeni rəhbərliklə əlaqə quran ilk ölkələrdən biri olub. Diplomatik nümayəndələrini Suriyaya göndərərək əməkdaşlığı inkişaf etdirməyə hazır olduğunu nümayiş etdirib və iki ölkə arasındakı münasibətlər yenidən qurulmasından mühüm rol oynayıb. Azərbaycanın humanitar yardımları müharibə fəlakətlərin aradan qaldırılmasına mühüm töhfə verib. Azərbaycan Suriyada iqtisadi, mədəni və sosial sahələrdə də ölkənin yanında olub. Xüsusilə enerji sahəsində göstərilən dəstək Suriyanın bərpasına və əsas xidmətlərin yaxşılaşdırılmasında töhfə verib".

Deputat bildirib ki, Suriya Prezidenti Əhməd əş-Şaraanın Azərbaycana səfəri də iki ölkə arasındakı münasibətlərdə böyük önəm daşıyıb:

"Dövlət başçısının səfər çərçivəsində keçirdiyi görüşlər iki ölkə arasında əməkdaşlığın inkişaf etdirilməsi və strateji tərəfdaşlığın gücləndirilməsi baxımından böyük əhəmiyyət daşıyır. Bu, eyni zamanda, Suriyaya yeni dövrdən sonra həyata keçirilən ilk prezident səfəri olub. Bu baxımdan səfər tarixi əhəmiyyətə malikdir"./Report.az

Azərbaycanda banklar və bank olmayan kredit təşkilatlarında kredit risklərinin idarə olunması qaydalarına dəyişiklik edilib.

Pressline.az "apa"-ya istinadla xəbər verir ki, bununla bağlı Azərbaycan Mərkəzi Bankının sədri Taleh Kazımov qərar imzalayıb.

Qərara əsasən, banklar və BOKT-lar müştərinin yazılı müraciəti ilə ona istehlak krediti müqaviləsinin məsafədən bağlanılmasına və ya kredit limitinin artırılması ilə bağlı müqaviləyə məsafədən dəyişiklik edilməsinə bütün satış kanalları vasitəsilə məhdudiyyət qoymaq imkanı yaratmalıdır. Müvafiq məhdudiyyət həmin müştərinin bankda fiziki iştirakı, gücləndirilmiş elektron imzası və ya gücləndirilmiş müştəri autentifikasiyası yolu ilə təqdim etdiyi yazılı müraciəti əsasında aradan qaldırıla bilər.

Banklar və BOKT-lar istehlak kreditinin verilməsi zamanı kredit müqaviləsinin məsafədən bağlanılmasına və ya kredit limitinin artırılması ilə bağlı müqaviləyə məsafədən dəyişiklik edilməsinə borcalanın tətbiq etdiyi məhdudiyyətin olmamasını öz informasiya sistemi vasitəsi ilə müəyyən etdikdə, məhdudiyyətin olub-olmamasını kredit bürosunun informasiya sistemi vasitəsilə də yoxlamalı və nəzərə almalıdır. İstehlak krediti üzrə müvafiq məhdudiyyətin mövcud olduğu şəxslə istehlak krediti müqaviləsinin məsafədən bağlanmasına və ya kredit limitinin artırılması ilə bağlı müqaviləyə məsafədən dəyişiklik edilməsinə yol verilməyəcək.

Qaydalara əsasən, məhdudiyyəti tətbiq etmiş şəxsdən istehlak krediti müqaviləsinin məsafədən bağlanması və ya kredit limitinin artırılması ilə bağlı müqaviləyə məsafədən dəyişiklik edilməsi üçün müraciət aldıqda, bu barədə müştərini mobil tətbiq və ya SMS məlumatlandırma vasitəsi ilə dərhal məlumatlandırılacaq.

Məsafədən istehlak krediti müqaviləsinin bağlanması və ya kredit limitinin artırılması ilə bağlı müqaviləyə məsafədən dəyişiklik edilməsi zamanı müraciət edən şəxs əvvəlcədən məlumatlandırılmaqla vəsaitlər aşağıdakı müddətlərdə veriləcək.

Belə ki, gün ərzində verilən və ya artırılan vəsaitin məbləği minimum əmək haqqının iki mislinədək olduqda, vəsait müqavilə bağlandıqdan və ya dəyişiklik edildikdən 2 saat sonra təqdim olunacaq. Məbləğ minimum əmək haqqının iki mislindən çox olduqda isə vəsait 24 saat sonra veriləcək.

Eyni zamanda, qaydalara əsasən, istehlak krediti müqaviləsinə kreditin verildiyi və ya kredit limitinin artırıldığı halda borclunun verilmiş (artırılmış) kredit üzrə öhdəlikdən azad edilməsi ilə bağlı müddəa daxil edilməlidir. Məsafədən rəsmiləşdirildiyi halda istehlak krediti müqaviləsinin məsafədən bağlanılmasına və ya kredit limitinin artırılması ilə bağlı müqaviləyə məsafədən dəyişiklik edilməsinə dair borcalanın tətbiq etdiyi məhdudiyyətin olub-olmaması barədə məlumat da daxil ediləcək.

Qeyd edək ki, qərar bu il oktyabrın 1-dən qüvvəyə minəcək.

Bu il iyunun 1-nə Azərbaycanın bank sektorunun aktivləri 59 milyard 183,7 milyon manat təşkil edib.

Pressline.az xəbər verir ki, bu barədə Azərbaycan Mərkəzi Bankı (AMB) məlumat yayıb.

Bu, ötən il iyunun 1-i ilə müqayisədə 4,7 % çoxdur.

Bankların aktivlərinin 28 milyard 990,9 milyon manatını müştərilərə verilmiş xalis kreditlər təşkil edib. Son 1 ildə sektorun kredit portfeli 8,6 % böyüyüb, kreditlərin aktivlərdəki payı isə 47,2 %-dən 49 %-ə yüksəlib.

Hesabat dövründə bank sektorunun öhdəlikləri 3,9 % artaraq 51 milyard 612,2 milyon manata, o cümlədən depozit portfeli 1 % artaraq 38 milyard 548,3 milyon manata çatıb. Bunun 17 milyard 426,1 milyon manatı fiziki, 21 milyard 122,2 milyon manatı isə hüquqi şəxslərin depozitləridir. İl ərzində əhalinin banklardakı vəsaitləri 18,3 %, şirkətlərin banklardakı vəsaitləri isə 9,9 % azalıb.

Son 1 ildə bankların Azərbaycan Mərkəzi Bankı qarşısında öhdəliyi isə təxminən 20 % azalaraq 0,4 milyon manat olub.

Sektorun balans kapitalı isə 10,4 % artaraq 7 milyard 571,5 milyon manat təşkil edib.

Respublika Neyrocərrahiyyə Xəstəxanası, Şəki və Şirvan Rayon Mərkəzi Xəstəxanalarının direktorları vəzifələrindən azad ediliblər.

Bununla bağlı Tibbi Ərazi Bölmələrini İdarəetmə Birliyinin (TƏBİB) icraçı direktoru Anar Bayramov əmr imzalayıb.

ABŞ Senatı Konqresin müvafiq icazəsi olmadan İrana qarşı hərbi əməliyyatların davam etdirilməsinin dayandırılmasını nəzərdə tutan hərbi səlahiyyətlər haqqında qətnaməni qəbul edib.

Pressline.az xəbər verir ki, bu barədə "NBC News" məlumat yayıb.

Məlumata görə, sənədi 50 senator dəstəkləyib, 48 senator isə əleyhinə səs verib. Qətnamənin lehinə demokrat senatorların demək olar ki, hamısı, həmçinin dörd respublikaçı səs verib.

Qətnaməyə əsasən, ABŞ Prezidenti Donald Tramp Konqres tərəfindən rəsmi müharibə elan edilmədiyi və ya hərbi qüvvədən istifadəyə ayrıca icazə verilmədiyi təqdirdə, ABŞ Silahlı Qüvvələrini İrana qarşı döyüş əməliyyatlarından çıxarmalıdır.

Qeyd olunub ki, bu, ABŞ Senatında hərbi səlahiyyətlərlə bağlı belə bir qətnamənin ilk dəfə səs çoxluğu qazanmasıdır.

Xatırladaq ki, daha əvvəl CNN Strateji və Beynəlxalq Araşdırmalar Mərkəzinə istinadən Pentaqonun İrana qarşı əməliyyatlara ən azı 40 milyard dollar xərclədiyini bildirmişdi.