Bəzən tarix elə insan taleləri yaradır ki, onlar bir roman qədər maraqlı, bir ömür qədər mənalı olur. Bu talelərin qəhrəmanları isə milliyyətindən, dilindən, mənsub olduğu ölkədən asılı olmayaraq insanlıq, mərdlik və sədaqət kimi ali dəyərlərin daşıyıcısına çevrilirlər.

     Bu gün sizə təqdim etdiyimiz insan da belə talelərdən birinin sahibidir.Onun adı Nəsrətullahdır.Nəsrətullah Nəcəfi. Otuz ildən artıqdır ki, Azərbaycanda yaşayır. Bu torpağın çörəyini yeyir, suyunu içir, sevincinə sevinir, dərdinə yanır. Amma onun Azərbaycana gəlişi adi bir həyat yolunun başlanğıcı olmayıb. O, bu ölkəyə iş axtarmağa, qazanc dalınca gəlməyib. Nəsrətullah 1992-ci ildə ölkəmizin ən ağır günlərində Qarabağ uğrunda döyüşmək üçün könüllü olaraq Əfqanıstandan Azərbaycana gəlib.

     Müharibənin alovlandığı, kəndlərin yandığı, şəhərlərin atəş altında qaldığı günlər idi. Ermənilər Rusiyanın köməyi ilə böyük təcavüzkarlıq siyasəti aparır, torpaqları, kəndləri zəbt edir, yandırır, insanları  öz doğma ev-eşiyindən, tarixi ata- baba yurdundan  didərgin salır, qaçqın həyatı yaşamağa məhkum edirdilər. Yenicə müstəqillik qazanmış Azərbaycan öz varlığı uğrunda, torpaqlarımızın bütövlüyü uğrunda gərgin mübarizə aparır,  erməni- rus işğalçılarına qarşı qəhrəmanlıqla döyüşürdü.. Məhz belə bir vaxtda Nəsrətullah dostları Həsən, Əkbər, Əşrəf, ustad Muxem ( karate ustası) və digər yoldaşları ilə birlikdə Azərbaycana üz tutdu. Onları bura gətirən nə sərvət arzusu idi, nə də şöhrət. Onları gətirən ədalət hissi, qardaşlıq duyğusu və haqqın yanında dayanmaq istəyi idi.

     Nəsrətullah müxtəlif döyüş bölgələrində vuruşdu. Ağdam istiqamətində, ön xətt mövqelərində, ən təhlükəli nöqtələrdə Azərbaycan döyüşçüləri ilə çiyin-çiyinə dayandılar. Həmin günlərdən danışarkən Nəsrətullah bu torpağın müdafiəçilərini öz silahdaşları, öz qardaşları adlandırırdı.Bir dəfə  bölmə komandiri  İsak onu yanına çağırıb demişdi: “ Sən döyüşəndə bir az ehtiyatlı ol. Özünü qorumağa çalış,  vuruşanda gözünə heç nə görünmür”. Onda Nəsrətullah ötkəm halda demişdi: “ Yoldaş komandir, biz Əfqanıstandan bura ölümdən qorunmaq üçün yox, döyüşmək üçün gəlmişik. Ölüm haqdır, vaxtı gələndə hamımız gedəcəyik. Amma  haqq- ədalət uğrunda, torpaq uğrunda vuruşub ölmək daha şərəflidir”

     Nəsrətullah Nəcəfinin  döyüş yolu ən çox Füzuli rayonu ilə bağlıdır. Füzuli torpağı Nəsrətullahın yaddaşında həm müharibənin ağrılarını, həm də həyatının ən gözəl xatirələrini yaşadır. O, bir müddət Əhmədbəyli kəndində olub. Burada yerli sakinlərlə yaxından ünsiyyət qurub, onların qonaqpərvərliyini, mərdliyini görüb. Məhz burada onun taleyini dəyişən hadisə baş verib. Bir gün Kurqan kəndindən Əhmədbəyliyə - bacısıgilə qonaq gəlmiş Qətibəni görür. O, dərin bir məhəbbətlə Qətibəyə vurulur. Sərhəd bilməyən məhəbbət sonsuz bir sevgiyə çevrilib Nəsrətullahın bütün varlığını bürüyür. Sanki dünyaya onun gözləri ilə baxır. Müharibənin ağır günləri, mərmi səsləri, təhlükəli şərait belə dərin bir sevgiyə mane ola bilmir. İki gənc bir-birinə möhkəm bağlanır.

      Beləliklə, Nəsrətullahın taleyi Azərbaycanla birdəfəlik birləşir.  O, bundan sonra Azərbaycana öz doğma vətəni, öz doğma torpağı kimi  baxır. Qətibəni sevdiyi kimi Azərbaycana da dərin ülfət bağlayır. O, indi daha ürəklə döyüşür, əsl cəsarət və qəhrəmanlıq nümunəsi göstərirdi.

      Qarabağın strateji yüksəklikləri uğrunda gedən döyüşlərdə, o cümlədən Qaracuğ istiqamətində baş verən şiddətli qarşıdurmalarda, ölüm- dirim mübarizəsində Nəsrətullah xüsusilə fəallıq göstərir. Hər iki tərəfin ciddi itkilər verdiyi həmin döyüşlərdə o, sağ qolundan  yaralanır və onu ağır vəziyyətdə hospitala çatdırılar.

     Həkimlər onun uzun müddət müalicə almalı olduğunu bildirirlər. Hətta döyüş bölgəsinə qayıtmasının təhlükəli olduğunu, hərbi xidmət üçün yararsız sayıldığını bildirirlər.Lakin Nəsrətullahın cavabı qısa və qəti olur:

     -Mən Azərbaycana istirahət etməyə yox, döyüşməyə gəlmişəm. Düşmənləri məhv etmək və gəldikləri yerə qədər qovmaq bizim müqddəs borcumuzdur. Məni Azərbaycana bağlayan qüvvə hər şeyə qadirdir.

      Bu sözlər sadəcə bir cümlə deyil, Nəsrətullah Nəcəfinin  xarakterinin, əqidəsinin və Azərbaycana  olan sonsuz sevgisinin aydın ifadəsi idi.

     Müalicəsini başa vurduqdan sonra Nəsrətullah yenidən cəbhəyə, ən qaynar nöqtəyə qayıdır və silahdaşlarının yanında yer alır. Dostları onu sağ-salamat görüb çox sevinirlər. Ustad Muxem Nərətullahı qucaqlayıb deyir:

     -Biz səni vətənimiz qədər çox sevirik. Səni görəndə elə bildik ki, Əfqanıstandayıq.

     -Bəs Azərbaycan? – deyə Nəsrətullah təəccüblə dostuna baxdı. -  Bəs Azərbaycan haradır?

     Usta  Muxem əvvəlcə dostunun sözlərini başa düşmədi. Sonra onu qucaqlayıb gülə- gülə dedi:

     -Bağışla, dostum, belə görürəm, deyəsən biz də tezliklə sənin yolunu gedəcəyik. Bax, onda birinci Azərbaycanın adını çəkmək bizim borcumuz olacaq.

      Hamı gülüşdü. Əşrəf  doyüş dostlarının arasından irəli çıxıb əlini dostunun çiyninə qoydu. Hamının eşidə biləcəyi bir səslə hündürdən dedi:

     -Azərbaycanda yaxşı bir məsəl var, biri- birindən soruşanda ki, “ Haralısan?”, deyir “ Hələ evlənməmişəm”. Fikirləşəndə bu, həqiqətən də belədir. Mən Nəsrətullahı çox gözəl başa düşürəm. Sevgi böyük qüvvədir. Onun milliyəti, dini, sərhəddi yoxdur.

  Nəsrətullah  sağ əlində avtomat hər iki dostunu qucaqladı:

-Bilirsiniz, dostlar, - dedi. – Sevginin bu qədər fövqəlgücə malik olduğunu bilmirdim. Adam ürəkdən vurulanda, necə deyərlər,  dünya  gözündə dəyişir, mənalaşır. Sizə də belə təmiz, pak, ilahi  bir sevgi arzulayıram...

     Nəsrətullah sözün həqiqi mənasında peşəkar döyüşçülər kimi vuruşurdu. Hətta onun bu cəsarəti düşmənləri də heyrətləndirirdi. Xaricdən gətirilmiş “ Belıy lifçik” adlanan snayperçi qızlar da Nəsrətullahın güllədən necə yayındığına,cəsarətinə, bacarığına və peşəkarlığına təəccüblənirdilər. Bir dəfə  qrup komandiri İsak maraqla ondan soruşmuşdu:

   - Yəni sən doğrudan ölümdən qorxmursan?

   Onda Nəsrətullah gülə- gülə cavab vermişdi:

    -  Sizdə yaxşı bir məsəl var: “ Qorxan gözə çöp düşər”.- Sonra da əlavə etmişdi.- Bilirsiniz necədir, yaxşı olar ki, siz bu sualı mənim yaşımda olan Ermənistandan gəlib Qarabağ torpaqlarında vuruşan döyüşçülərindən soruşun. Onlar daha düzünü deyərlər...

     Nəsrətullah iki il Qarabağda döyüşəndən sonra, yəni 1994 – cü ilin mayında  atəşkəsin tam təmin edilməsi və  hərbi əməliyyatların dayandırılması barədə saziş elan olundu. Artıq o qanlı- qadalı illərdən uzum müddət keçib, müharibənin qara tüstüsü çəkilib, həyat öz axarına dönüb. Nəsrətullah isə Azərbaycanı tərk etməyib. Qətibə  Yunis qızı ilə ailə həyatı qurub burada yaşayır və  işləyir. Bu gün onun iki övladı var: bir oğlu və bir qızı. Oğlu Məhəmməd evlidir, qızı Nazilə xanım isə nişanlıdır. Nəsrətullah indi Azərbaycan vətəndaşıdır. Artıq o, yalnız Azərbaycanda yaşayan bir əfqan deyil. O, Azərbaycan ailəsinin başçısı, Azərbaycan övladlarının atası, Azərbaycan nəvələrinin babasıdır.

     Bəlkə də Nəsrətullahın həyat hekayəsinin ən təsirli tərəfi elə budur. O, Azərbaycana döyüşçü kimi gəldi, amma burada özünə Vətən tapdı. Bu torpağın ağrısını da, sevincini də öz taleyinin ayrılmaz hissəsinə çevirdi.

     Belə insanlar xalqlar arasında görünməz körpülər yaradırlar. Onlar sübut edirlər ki, qardaşlıq qanla deyil, ürəklə ölçülür. Vətən sevgisi isə bəzən insanın doğulduğu torpaqlardan daha uzaqlarda yaranır. Məhz bu müqəddəs sevgidir ki, onun yaratdığı  insani və mənəvi dəyərlər sayəsində  Nəsrətullah işlədiyi şirkətdə insanların hörmətini qazanmış, öz halal zəhməti, bacarığı, fədakarlığı və əməksevərliyi ilə onların qəlbində xoş duyğular oyatmışdır.Valeh, Elnur, İntiqam və adlarını bilmədiyim digər  əməkdaşlar mənən zəngin, dostluğu qiymətləndirməyi, münasibət qurmağı bacaran  gözəl insanlardır. Həyat elə gətirdi ki, Nəsrətullah Nəcəfini və bu gözəl insanları tanımaq və onlarla yaxından tanış olmaq qismətimə düşdü.. Bu tanışlıqdan  məmnun oldum. Çox qəribədir ki, nə qədər işə tez getsəm və nə qədər işdən gec çıxsam da onları hər zaman  iş başında görürdüm. Məni ən çox duyğuilandıran və böyük məmnunluq hissləri yaradan isə Sinan bəy kimi yüksək  dəyərlər və mədəniyyat sahibi olan bir insanın onlara rəhbərlik etməsidir. Hamısına  möhkəm cansağlığı və  möhtəşəm uğurlar arzulayıram.

     Nəsrətullahın ömür yolu məhz belə bir həyatın, belə bir sədaqətin və belə bir insanlıq nümunəsinin təcəssümüdür.

                                                                                        Nizami  TƏHMƏZOV.

    İnsan itirdiklərinə acıdığı kimi, qazanc bildiyi tapdıqlarına da sevinir. Bu qazanc insan olanda daha çox sevinirsən. Çünki tapdığın sənə dost olur, doğmana çevrilir. İkinci özün, çoxdan axtardığın adam olur. Dərdləşirsən. Onunla danışanda rahatlanırsan, boşalırsan.
Sənə elə gəlir ki, onu illərdi tanıyırsan. Söylənənləri görmüş, yaşananları yaşamış kimi olursan. Hər şey sənə tanışdır.
O, ürək qapısına açıq insandı.  Qapını döyən də sevinir, qapısı döyülən də.
Yanında olmayanda da yanında olan kimi hiss edirsən. Yol yoldaşın, dərd sirdaşın olur. 
Uzaqda olanda özünə, sözünə, səsinə darıxırsan. Bilirsən ki, nə vaxt çağırsan yanında olacaq, yanında olacaqsan. Sevinci, kədəri, ağrını bölüşmək üçün. İnsan bölüşəndə yüngülləşir.
Bu qazanc ömrünü uzadır. Ərk etdiyin, ümid bağladığın adamın var.
O safdır, təmizdir. Lap təzəcə doğulan uşaq kimi. Üzündəki təbəssüm, gözündəki ümid tanıyanlara, doğmalara yaşam həvəsi verir.
Niyyətində, istəyində kölgə yoxdur. Ancaq özü olmayanda kölgəsi yanında olur. Həmdəm işıqlı kölgəsi.
Özündən çox sükutu, uzaqlara baxan xəyalları danışır. Demək istədiklərini baxışlarından oxumaq olur. Onun özü də elədi. İnsan çox şeyi dilinə gətirmək istəmir. Bilir ki, anlayan baxışından anlayacaq. Bəzi şeylərin dilə gətirilməsi ucuzlaşmış sayılır. 
Belə insanlardan daha çox yazmaq istəyirsən, ancaq yaza bilmirsən, sərhəd qoymur. Keçə bilmirsən o sədləri. Baryerlər həmişə müdafiə deyil, çox zaman mühafizə rolunu oynayır. Söz bəzən ona, bəzən sənə dəyib qayıdır.
Sükutu danışdığından çox danışan insanın bu dəfə danışa bilmədiyindən yox, «danışmaq olmaz”ından, kənarda qalanlardan danışılacaq. Yəni, azından.
Ona görə də proporsiya burda pozulur — qırılır. Bunun neçəsinin yazıya düşəcəyi hələ bilinmir.
Qələm də duruxa-duruxa: „Olar? Olmaz!“ — deyərək tərəddüddədir.
Bunları yazıya köçürmək çox çətindi. 
Oxucu, yəqin bunu nəzərə alar.
Beləliklə, yazılmayanlar yazılanlardan çox alınır. 
Hər söz də bir qənimətdi, — deyib yola çıxırıq.

***
Kənardan zərif görünən insanın bərkimiş iradəsi, dözümü var. Onu yaxından tanıyana dönüş nöqtəsi bir söz, bir baxış ola bilər — əvvələ, ya da sona dönməyə.
Prinsiplərinə sadiqdir. Hər kəslə ünsiyyət qurmaz. İlk söhbətdən qərar verər. Qərarları bildiklərinə — analiz və təhlillərinə, təcrübəsinə əsalanar. 
Təmənnasız insanın təmannasız insan — insanlıq sevgisi var.
Süzülən gözlərin kiprik pərdələri hər şeyi deyər, anladar. Burda nöqtədə ola bilər, vergül də. 
Öz bildiklərinə inanar, bir də inandıqlarına. Sonda yenə qərar özünün olar.
Sevdiklərini ikiəlli tutar. Özünə nəzarət hər zaman yerindədir.
Bütün yazarlar kimi o da əsərlərində həm də özünü yazır. Onun yazılarında da özündəki kübarlıq var. Artıq kəlmələr işlətmir, bilmədiyini, görmədiyini, təsəvvüründə canlandırmadığını yazmır. Mümkün görünməyənlərin içində onun mütləq mümkün bir gördüyü var. 
İnsan psixologiyasına bələd olması ona kənardan baxaraq zamanla müşahidədə saxlamaqdan doğan təəssüratları,  təhlil, nəticə. Tanıdığı, qəbul etdiyi insana diqqət, inam, sədaqət, və özünə doğma bildiyini buraxmaq istəməməsi…  Hər şey bundan başlayır.
Təəccüblərinin sevinci bəzən «bir maşın gül”ə dönür. „Anlaşılmayan, başa düşülməyən, qapısı daim bağlı olan qonşusunun iç dünyasının böyüklüyü“ ilə oxucunu heyrətləndirər. „Qaşqabaqlı görünən acıqlı adamın bölüşməyə nə qədər ehtiyacı olduğunu“, „həmişə yolunda gördüyü, dərdini bölüşdüyü akasiya ağacı”nın yoxluq kədəri, bir „yasəmən gülünün insan həyatındakı dəyişikliyi“, „eyni xəstəliyi xəbərsiz yaşananın bir-birini duyub yaşamaq istəkləri“… Çox şeyin danışmağa yox, bir baxışa olan ehtiyacı. „Göyərçün sevgisi“. „Sirr adamın sirri, onun açılmasının ötürülmə nüansları“. „Danışmaq istəməyənlərin danışmaq istəyi“ — danışdırılması. „Heç vaxt görmədiyi insanın bir sözə ehtiyacının sevinc yaşantıları və əbədi sevgisi“. 
Və bütün arzuların „QIŞ NAĞILI“…  Bir anın nələrə qadir olması… Duymaq və duyulmaq… 
Hisslər, duyğular, gizli yaşananların baxış söhbətləri. Görünməyənlərin görüntüləri. Hər şeyin bir anda dəyişə bilməsi — əsərlərinin ana xəttini təşkil edən Sevgi.

İnsan doğulduğu yerə oxşayır. Elə insan da var ki, o həm də doğulduqları günə oxşayırlar. Uşaq Günündə dünyaya gələn, uşaq qəlbli, gəlişinə sevindiyimiz, doğmamız Təranə xanım Məmməd kimi!

                                                               
08.05.2026 

Göygöl şəhərində açıq hava şəraitində keçirilən tədbirdə 300 uşaq iştirak edib. Peşəkar yaradıcı teatr heyəti tərəfindən rus yazıçısı Korney Çukovskinin məşhur nağılı əsasında səhnələşdirilmiş “Milçək-Vizilçək” tamaşası nümayiş olunub. Rəngarəng personajlar və maraqlı süjet xətti ilə seçilən tamaşa uşaqlara dostluq, cəsurluq və xeyirxahlıq kimi dəyərləri aşılayıb.

Daşkəsən Rayon Mədəniyyət Mərkəzində təşkil olunan növbəti tamaşada dramaturq Vüqar Haqverdiyevin “Qarınqulu ayı balası” pyesi əsasında hazırlanmış səhnə əsəri təqdim edilib. 350 uşağın izlədiyi tamaşa sadəlik, təvazökarlıq və qənaətçillik kimi müsbət mənəvi keyfiyyətləri təbliğ edərək iştirakçılar tərəfindən böyük maraqla qarşılanıb.

Tədbirlər çərçivəsində nağıl qəhrəmanlarının iştirakı ilə müxtəlif əyləncəli proqramlar təşkil olunub, uşaqlar üçün interaktiv oyunlar və maraqlı çıxışlar təqdim edilib. Tamaşalarda şəhid ailələrinin övladları, müharibə iştirakçıları və müharibə nəticəsində sağlamlığını itirmiş şəxslərin ailə üzvləri, eləcə də “AzerGold” QSC-nin fəaliyyət göstərdiyi mədənlərin ətrafında yerləşən kəndlərdə yaşayan uşaqlar iştirak ediblər.

“AzerGold” QSC-nin regionlarda həyata keçirdiyi bu mədəni-maarifləndirici təşəbbüs şirkətin korporativ sosial məsuliyyət fəaliyyəti çərçivəsində uşaqların fərdi inkişafına və dünyagörüşünün genişləndirilməsinə yönəlmiş layihələrinin tərkib hissəsidir. Tədbirlərin əsas məqsədi uşaqların asudə vaxtının səmərəli təşkili, onların mədəni istirahət imkanlarının artırılması və bayram sevincinin daha yaddaqalan olmasıdır.

Pressline.az xəbər verir ki, Sərfəli mobil operator “Nar”ın dəstəyi ilə Peşə Əmək Reabilitasiya Mərkəzində “JestPlus” mobil tətbiqinin istifadəsinə həsr olunmuş maarifləndirici görüş keçirilib. Tədbirdə 30 eşitmə və nitq məhdudiyyətli şəxs iştirak edib. Görüşün məqsədi iştirakçıları “JestPlus” mobil tətbiqinin istifadə qaydaları və təqdim etdiyi imkanlarla tanış etmək olub. Azərbaycanda ilk dəfə jest dilinin öyrənilməsi üçün yaradılan “JestPlus” tətbiqi istifadəçilərə interaktiv dərslər, testlər və praktiki tapşırıqlar vasitəsilə jest dilini sistemli şəkildə mənimsəməyə imkan verir. Tətbiq eşitmə və nitq məhdudiyyətli şəxslərin ünsiyyət imkanlarının genişləndirilməsinə, inklüzivliyin təşviqinə və jest dilinin daha geniş auditoriya üçün əlçatan olmasına xidmət edir. Bu mühüm sosial layihə “Nar”la yanaşı, ADA Universiteti və ADA Universiteti Fondunun, bp və onun tərəfdaşlarının dəstəyi ilə reallaşdırılıb. Qeyd edək ki, “JestPlus” tətbiqini “App Store” və “Google Play” platformalarından yükləmək mümkündür.

 
 Tədbirdə Peşə Əmək Reabilitasiya Mərkəzinin direktoru Rəhilə Həsrətli, “Karlara Dəstək” İctimai Birliyinin sədr müavini Heydər Rəhimli, “Nar”ın Koprorativ sosial məsuliyyət və sponsor layihələri üzrə eksperti Nuranə Əliyeva və ADA Universitetinin nümayəndəsi, “JestPlus” layihəsinin texniki məsələlər üzrə rəhbəri Amir Adamov çıxış edərək rəqəmsal inklüzivliyin və əlçatan təhsil imkanlarının əhəmiyyətini vurğulayıblar. İnteraktiv formatda keçirilən görüş zamanı iştirakçılara tətbiqin funksiyaları nümayiş etdirilib, onların sualları cavablandırılıb və tətbiqdən istifadə ilə bağlı  praktiki tövsiyələr təqdim olunub.

“Nar” cəmiyyətin müxtəlif qrupları üçün bərabər imkanların yaradılmasına və rəqəmsal əlçatanlığın artırılmasına yönəlmiş təşəbbüsləri dəstəkləməyə davam edir.

Hazırda 2,2 milyon abunəçiyə xidmət göstərən “Nar” son 7 il ərzində Müştəri Loyallığı İndeksi göstəricisinə əsasən Azərbaycanda lider mobil operatordur. Bu uğurun arxasında “Nar”ın ardıcıl şəkildə həyata keçirdiyi müştəriyönümlü strategiya dayanır. Mobil operator istifadəçilərinə sərfəli qiymət qarşılığında dayanıqlı və yüksəkkeyfiyyətli rabitə xidmətləri, müxtəlif internet paketləri və müasir eSim texnologiyası təqdim edir.

Pressline.az: Abşeron rayonunda şəhidlərimizin bizə əmanət qalan övladları üçün “1 iyun - Uşaqların Beynəlxalq Müdafiəsi Günü” ilə əlaqədar bayram şənliyi keçirilib. Dövlət Turizm Agentliyinin və Abşeron RİH-nin birgə təşkilatçılığı ilə Qobustan Palçıq Vulkanları Turizm Kompleksində baş tutan tədbirdə Agentliyin sədri Fuad Nağıyev, RİH başçısı Abdin Fərzəliyev, şəhid ailələri və onların övladları iştirak ediblər. Əvvəlcə şəhid övladlarının iştirakı ilə Ümummilli Lider Heydər Əliyevin abidəsi ziyarət edilib, önünə tər çiçəklər düzərək xatirəsi ehtiramla yad edilib.
Sonra Palçıq Vulkanları Turizm Kompleksindəki muzeylə tanışlıq gəzintisi olub, ərazidəki palçıq vulkanlarına baxış keçirilib. O cümlədən uşaqlar üçün rəssamlıq, heykəltaraşlıq və dulusçuluq üzrə master-klaslar təşkil edilib.
RİH başçısı Abdin Fərzəliyev çıxış edərək bildirib ki, əsası Ümummilli Lider Heydər Əliyev tərəfindən qoyulan uşaq-gənclər siyasəti Azərbaycan Respublikasının Prezidenti cənab İlham Əliyev tərəfindən uğurla həyata keçirilir, uşaqlara hərtərəfli diqqət və qayğı göstərilir. Eyni zamanda şəhidlərimizin ailə üzvləri və onların yadigarları dövlətin hər cür diqqət və qayğısı ilə əhatə olunub. Qeyd edilib ki, Birinci vitse-prezident Mehriban xanım Əliyeva tərəfindən daima uşaqların keyfiyyətli təhsil və yüksək dünya standartlarına cavab verən tibbi xidmətlərlə təmin edilmələri, hərtərəfli qayğı ilə əhatə olunmaları diqqət mərkəzində saxlanılmış və bu istiqamətdə onun təşəbbüsü ilə çoxsaylı tədbirlər görülmüş, layihələr həyata keçirilmişdir. 
RİH başçısı bildirib ki, ölkəmizdə uşaqların sağlam və savadlı böyüməsi Heydər Əliyev Fondunun siyasətinin prioritet istiqaməti olduğundan Fond tərəfindən bu istiqamətdə müxtəlif və genişmiqyaslı proqramlar həyata keçirilməkdədir.
Daha sonra RİH başçısı şəhid Fərid Seyfullayevin övladı Səmanın doğum günü münasibəti ilə təbrik edib. 
Tədbirin sonunda “1 iyun - Uşaqların Beynəlxalq Müdafiəsi Günü” münasibəti ilə şəhid övladları üçün bayram şənliyi keçirilib.
Qeyd edək ki, bu gün Abşeron RİH yanında İctimai Şura tərəfindən rayonun Şəfəq qəsəbəsində yerləşən 2 nömrəli tam orta məktəbdə də “1 iyun - Uşaqların Beynəlxalq Müdafiəsi Günü” ilə əlaqədar bayram tədbiri keçirilib. Bayram şənliyində şəhid ailələri, şəhid və qazi övladları, o cümlədən məktəbin kollektivi iştirak edib. 
Tədbirdə YAP Abşeron Rayon Təşkilatının sədri Abbas Əliyev və Abşeron RİH yanında İctimai Şuranın sədri Xatirə İsmayılova çıxış edərək  uşaqları bayram münasibəti ilə təbrik edib, ölkəmizdə uşaqlara yaradılan şəraitdən, onların azad və təhlükəsiz yaşamaları, təhsil almaları, inkişaf etmələri və mütəxəssis kimi formalaşmaları istiqamətində həyata keçirilən dövlət layihələrindən danışıblar.

Pressline.az Sərfəli mobil operator “Nar” 1 iyun – Uşaqların Beynəlxalq Müdafiəsi Günü münasibətilə təhsilin inkişafına yönəlmiş təşəbbüslərini davam etdirir. Bu əlamətdar gün çərçivəsində şirkət Bakıda yerləşən Kimya-biologiya təmayüllü Respublika liseyinə 20 ədəd noutbuk təqdim edib.

Tədbirdə iştirak edən Kimya-biologiya təmayüllü Respublika liseyinin direktoru və “Nar”ın nümayəndəsi bildirib ki, gənclərin keyfiyyətli təhsil alması, müasir texnologiyalardan istifadə imkanlarının genişləndirilməsi ölkənin gələcək inkişafı baxımından mühüm əhəmiyyət daşıyır. Qeyd olunub ki, təqdim edilən noutbuklar şagirdlərin bilik və bacarıqlarının inkişafına töhfə verəcək, təhsilə yönəlmiş bu cür təşəbbüslər isə gələcəkdə ölkənin elm və iqtisadiyyatına dəyər qatacaq peşəkar kadrların yetişməsinə xidmət edir.

Qeyd edək ki, “Nar” təhsilə və gənclərin inkişafına dəstəyi korporativ sosial məsuliyyət fəaliyyətlərinin əsas istiqamətlərindən biri kimi müəyyən edib. Şirkət qəbul imtahanlarında yüksək nəticə göstərən tələbələrin mükafatlandırılması, nitq və eşitmə məhdudiyyətli şəxslər üçün peşə təlimlərinin təşkili, eləcə də müxtəlif təhsil və inkişaf layihələrinin dəstəklənməsi vasitəsilə gənclərin bilik və bacarıqlarının artırılmasına töhfə verir.

Hazırda 2,2 milyon abunəçiyə xidmət göstərən “Nar” son 7 il ərzində Müştəri Loyallığı İndeksi göstəricisinə əsasən Azərbaycanda lider mobil operatordur. Bu uğurun arxasında “Nar”ın ardıcıl şəkildə həyata keçirdiyi müştəriyönümlü strategiya dayanır. Mobil operator istifadəçilərinə sərfəli qiymət qarşılığında dayanıqlı və yüksəkkeyfiyyətli rabitə xidmətləri, müxtəlif internet paketləri və müasir eSim texnologiyası təqdim edir.

Bizim milli musiqi alətlərimiz olan tar, kamança sadəcə səs deyil, ruhun melodiyasıdır. Hər akkordda xalqın arzuları, fədakarlığı və sevgi dolu xatirələri var. Hər xalça motivində isə bir sirlə üzləşirsən: əcdadın gözündəki həyat hekayəsi.

Amma dünya böyükdür… Louvre Muzeyində “Mona Lisa”ya baxarkən sən də hiss edirsən ki, insan yaradıcılığı sərhəd tanımır. Kyoto Tapınakları-dəki sakitlik, Zen fəlsəfəsi ruhunu dincəldir, sən də düşünürsən: hər mədəniyyət öz hekayəsini danışır, amma hamısı bir dildə — insan ruhunun dilində danışır.

Mədəniyyət həm də körpüdür - keçmişlə gələcək, fərqli xalqlar arasında, sənlə mən arasında. Azərbaycan mədəniyyəti dünya ilə dialoq qurur, dünya mədəniyyəti bizə baxır. Biz baxanda isə görürük ki, sənin ruhunla mənim ruhum, qara torpağımızla uzaq ölkələr bir-birinə toxunur.

Və bu toxunuşda, mən hiss edirəm ki, mədəniyyət sadəcə tarix və sənət deyil… o, sevgi, yaddaş və həyatdır. Hər birimiz onun bir parçasıyıq, hər birimiz onun hekayəsini yazırıq.

Rəfail İNCƏYURD

Şair

İlham QƏHRƏMAN:

Şair.

Rafiq CƏRULLAYEV,

Bioenergetik, ekstrasens  həkim