ABŞ və Körfəz ölkələri Hörmüz boğazı ilə bağlı BMT qətnaməsi hazırlayır

ABŞ və Körfəz ərəb ölkələri Hörmüz boğazında yaranmış vəziyyətlə bağlı BMT Təhlükəsizlik Şurası üçün yeni qətnamə layihəsi hazırlayır.

Pressline.az "Reuters"ə istinadən xəbər verir ki, bu barədə ABŞ-nin BMT-dəki səfiri Mayk Volts açıqlama verib.

Onun sözlərinə görə, qətnamə layihəsi İranın boğazda gəmiçiliyə maneə yaratmasını pisləməyi nəzərdə tutur. Bildirilir ki, sənəddə Tehrandan ticarət gəmilərinə hücumların dayandırılması, gəmi keçidinə rüsum tətbiqi cəhdlərinə son qoyulması, həmçinin dəniz minalarının yerləşdirilməsinin dayandırılması və onların yerlərinin açıqlanması tələb oluna bilər.

Məlumata görə, yeni layihə ABŞ ilə yanaşı Bəhreyn tərəfindən hazırlanır, Küveyt, Qətər, Birləşmiş Ərəb Əmirlikləri və Səudiyyə Ərəbistanı da prosesdə iştirak edir.

Qeyd olunur ki, sənəd bu həftə müzakirəyə çıxarılacaq. Daha əvvəl Rusiya və Çin ABŞ-nin təşəbbüsü ilə təqdim olunan oxşar qətnamə layihəsinin qəbuluna mane olmuşdu./teleqraf