Paşinyandan Moskvanın Zelenski ilə bağlı açıqlamasına reaksiya: Putin də mənim yanımda çox söz deyib

Ermənistanın Baş naziri Nikol Paşinyan Ukrayna Prezidenti Volodimir Zelenskinin İrəvanda Rusiya əleyhinə verdiyi açıqlamalara Moskvanın reaksiyalarına münasibət bildirib.

Pressline.az xəbər verir ki, o, Ermənistanın bütün qlobal məsələlərə qarışmaq istəmədiyini deyib.

“Avropa Siyasi Birliyi sammitinin harada keçirilməsinin əhəmiyyəti yoxdur, bu, mənim tədbirim olduğu qədər digər tərəfdaşlarımızın da tədbiridir. Bu, insanların özlərini ifadə etdiyi çoxtərəfli bir platformadır.

Düşünmürəm ki, ev sahibi ölkənin başçısı kimi hər şeyə senzura qoymalıyam və ya mütləq cavab verməliyəm. Bu, çoxtərəfli platformadır və insanlar özlərini burada ifadə edirlər. Rusiya Prezidentinin (Vladimir Putin) mənim də yer aldığım görüşlərdə müxtəlif ölkələr haqqında açıqlamalar verdiyi vaxtlar olub və Rusiyanın məndən onlara cavab verməyimi gözlədiyini xatırlamıram”, - Paşinyan qeyd edib.

Baş nazir əlavə edib ki, Ermənistan bütün qlobal proseslərə müdaxilə etmək iddiasında deyil:

“Biz öz gündəliyimiz olan kiçik ölkəyik, öz gündəliyimiz var. Özümüzü qabağa atıb bütün qlobal məsələlərlə bağlı bəyanatlar verməyi düzgün hesab etmirik”.

Xatırladaq ki, Volodimir Zelenskinin mayın 4-də Avropa Siyasi Birliyinin İrəvanda keçirilən sammitindəki çıxışında Rusiya əleyhinə verdiyi sərt bəyanatlara görə Ermənistanın Moskvadakı səfiri Xarici İşlər Nazirliyinə çağırılmışdı.