ABŞ məhkəməsi Trampın "H-1B" vizaları üçün müəyyən etdiyi 100 min dollarlıq rüsumu ləğv edib

ABŞ Federal Məhkəməsi Donald Tramp administrasiyası tərəfindən "H-1B" vizalarının alınması üçün müraciət edərkən tətbiq olunmuş 100 min dollar məbləğindəki məcburi ödənişi qanunsuz hesab edib.

Pressline.az xəbər verir ki, bu barədə "CBS News" məlumat yayıb.

Dairə hakimi 2025-ci ilin sentyabrında tətbiq olunmuş tədbirə etiraz edən 20 ştatın iddiasını təmin edib. Məhkəmə müəyyən edib ki, administrasiya konqresin təsdiqi olmadan müraciətlərin verilməsinə faktiki olaraq vergi tətbiq etməklə səlahiyyətlərini aşıb. Qərarda qeyd edilib ki, ödəniş öz mahiyyəti etibarilə vergidir və qüvvədə olan qanunvericilik icraedici hakimiyyətə belə məcburi rüsumlar tətbiq etmək hüququ vermir.

Daxili Təhlükəsizlik Nazirliyi qərarı tənqid edərək onu "məhkəmə aktivizmi" adlandırıb və bildirib ki, rüsumların artırılması ABŞ işçi qüvvəsinin qorunmasına və proqramın şəffaflığının artırılmasına yönəlmişdi.

1990-cı ildə konqres tərəfindən yaradılmış "H-1B" proqramı şirkətlərə dar ixtisaslar üzrə xarici mütəxəssisləri altı ilə qədər müddətə işə cəlb etməyə imkan verir. İllik kvota 65 min viza, üstəgəl, yüksək dərəcə sahibləri üçün əlavə olaraq 20 min viza təşkil edir. İşəgötürənlər üçün qüvvədə olan rüsumlar, adətən, 1,7-4,5 min dollar aralığındadır.