Qarabasma fenomeninin pərdəarxası: Yuxu iflici zamanı beynin yaratdığı qorxunc xəyalların tibbi izahı

Xalq arasında "qarabasma" kimi tanınan yuxu iflici, əsrlər boyu mistik varlıqlarla və ya qara qüvvələrlə əlaqələndirilib. İnsan yuxudan oyanır, lakin bədənini hərəkət etdirə bilmir, sinəsində ağırlıq hiss edir və otaqda naməlum varlıqlar görür. Bu qorxunc təcrübənin arxasında əslində sadə bir bioloji proses dayanır.

Pressline.az xəbər verir ki, yuxu iflici REM (sürətli göz hərəkəti) yuxusu ilə oyanıqlıq halının kəsişməsidir. Normalda REM yuxusu zamanı beynimiz bədənimizi iflic vəziyyətinə salır ki, yuxuda gördüyümüz hərəkətləri realda təkrarlayıb özümüzə zərər verməyək.

Lakin bəzən beyin bədəndən daha tez "oyanır" və iflic halı davam edir. Bu keçid anında beyin hələ də yuxu görməyə davam etdiyi üçün real mühitlə yuxu görüntülərini birləşdirir və nəticədə qorxulu hallüsinasiyalar yaranır.

Tibbi araşdırmalar göstərir ki, stress, yuxu rejimsizliyi və kürəyi üstə yatmaq bu halın baş vermə ehtimalını artırır.