Horovlu yenidən doğulur: Quruculuq və rifahın yeni ünvanı

Pressline.az xəbər verir ki, işğaldan azad olunmuş ərazilərdə aparılan genişmiqyaslı bərpa və yenidənqurma işləri artıq konkret yaşayış məntəqələrində real nəticələrini göstərməkdədir. Bu baxımdan Cəbrayıl rayonunun Horovlu kəndi diqqət çəkən nümunələrdən biri kimi ön plana çıxır.
Aparılan müşahidələr və kənd sakinləri arasında keçirilən sorğular zamanı məlum oldu ki, qısa müddət ərzində Horovlu kəndi demək olar ki, tamamilə yeni sima qazanıb. Sakinlər görülən işləri yüksək qiymətləndirərək bildirirlər ki, yaradılan şərait onların gündəlik həyatına müsbət təsir göstərib və kəndə bağlılıqlarını daha da gücləndirib.

Kənd ərazisində gözoxşayan mənzərələr, abad küçələr, müasir üslubda inşa olunmuş inzibati binalar, uşaq bağçası, mədəniyyət mərkəzi, idman-sağlamlıq kompleksi və müxtəlif ticarət obyektləri diqqəti cəlb edir. Eyni zamanda bazar və açıq ticarət sahələrinin fəaliyyət göstərməsi kənddə iqtisadi aktivliyin artmasına şərait yaradır. Horovluda yerləşən və sakinlər arasında “Sarı ocaq” kimi tanınan ziyarətgah kəndin mənəvi həyatında xüsusi yer tutur. Bununla yanaşı, qədim kəhriz sisteminin bərpa olunaraq istifadəyə verilməsi həm tarixi irsin qorunması, həm də su təminatı baxımından mühüm əhəmiyyət daşıyır. Kənddə salınmış geniş park ərazisi sakinlərin asudə vaxtlarının səmərəli təşkili üçün əlverişli şərait yaradır. Burada ailələrin, gənclərin və uşaqların aktiv istirahəti üçün bütün imkanlar mövcuddur və bu da kənddə sosial həyatın canlanmasına səbəb olur.

Sakinlər qeyd edirlər ki, həyata keçirilən bu layihələr nəticəsində Horovlu artıq təkcə yaşayış məntəqəsi deyil, eyni zamanda müasir  standartlara cavab verən, inkişaf edən bir kənd modelinə çevrilməkdədir. Onların sözlərinə görə, yaradılan şərait gələcəyə olan inamı artırır və doğma torpaqlara qayıdışı daha da stimullaşdırır. Ümumilikdə aparılan təhlillər göstərir ki, Horovlu kəndində həyata keçirilən yenidənqurma və abadlıq işləri kompleks yanaşmanın nəticəsidir. Burada həm infrastruktur quruculuğu, həm sosial rifahın yüksəldilməsi, həm də tarixi-mədəni dəyərlərin qorunması paralel şəkildə həyata keçirilir.
Sakinlərin müsbət fikirlərini və kənddə aparılan quruculuq işlərinin görüntülərini təqdim etdiyimiz video materialda daha ətraflı izləyə bilərsiniz.