Ukraynanın Priluki şəhəri raket atəşinə tutuldu

Rusiya qüvvələri mayın 19-da səhər saatlarında Ukraynanın Çerniqov vilayətində yerləşən Priluki şəhərinə ballistik raketlə hücum edib.

Pressline.az xəbər verir ki, Çerniqov Vilayət Hərbi Administrasiyasının rəhbəri Vyaçeslav Çaus Telegram kanalında bildirib ki, hücum yerli vaxtla təxminən saat 10:00-da həyata keçirilib. Zərbə şəhərdə yerləşən müəssisələrdən birinə dəyib.

Partlayış nəticəsində yaxınlıqdakı ticarət mərkəzi, supermarket və yanğınsöndürmə texnikası da ciddi ziyan görüb.

İlkin məlumata görə, hücum nəticəsində iki nəfər ölüb, azı 17 nəfər yaralanıb. Yaralılar arasında 14 yaşlı uşaq da var. Həkimlər zərərçəkənlərə tibbi yardım göstərir.

Çerniqov vilayət polisi hadisə yerində istintaq-əməliyyat qruplarının, kriminalistlərin və fövqəladə hallar xidmətlərinin çalışdığını açıqlayıb. Hücumun nəticələri sənədləşdirilir və mülki əhaliyə yardım göstərilir.

Sonradan məlum olub ki, raket zərbəsi nəticəsində “Epitsentr” ticarət mərkəzi də dağıntılara məruz qalıb. Şirkət rəhbərliyinin məlumatına görə, iki əməkdaş yaralanıb, onların həyatı təhlükədə deyil.

Partlayış dalğası binanın arxa divarını demək olar ki, tamamilə dağıdıb. Hadisədən sonra yaranan yanğın Ukrayna Fövqəladə Hallar Xidmətinin əməkdaşları tərəfindən qısa müddətdə söndürülüb.