Pensiyanız arta bilər - Çoxunun bilmədiyi hesablama

2006-cı ildən əvvəlki iş stajı pensiya kapitalına necə çevrilir? Bu, gələcək pensiyanın məbləğinə necə təsir edir?

Pressline.az xəbər verir ki, Globalinfo.az-a danışan iqtisadçı Elçin Rəşidov 2005-ci ilin sonunadək olan dövr üzrə pensiya hesablanarkən vətəndaşın topladığı pensiya kapitalı yox, iş stajı nəzərə alınır deyib.

“Həmin dövr üçün hər il iş stajına görə 306 manat məbləğində şərti pensiya kapitalı hesablanır. Məsələn, şəxs 2006-ci ilədək yeddi il işləyibsə, onun üçün 7 × 306 manat, yəni 2142 manat pensiya kapitalı müəyyən edilir. 2006-cı ildən sonrakı dövr üzrə isə vətəndaşın fərdi hesabında toplanan və indeksləşdirilən pensiya kapitalı nəzərə alınır. Bu məbləğlər şəxsin fərdi pensiya hesabına əlavə olunur”.

İqtisadçı bildirib ki, yaşa görə əmək pensiyası təyin edilərkən fərdi hesabda toplanmış ümumi pensiya kapitalı 144 aya bölünür:

“Bu da 12 illik dövrə uyğun ayların sayıdır. Nəticədə əldə olunan məbləğ vətəndaşın aylıq pensiyasını təşkil edir. Beləliklə, pensiya məbləği hesablanarkən 2006-cı ildən əvvəlki dövr üzrə iş stajına görə hesablanan şərti kapital və 2006-cı ildən sonrakı dövrdə toplanmış faktiki pensiya kapitalı birləşdirilir. Bu səbəbdən, xüsusilə 2006-cı ildən əvvəl uzunmüddətli əmək stajına malik olan şəxslərin pensiya məbləği daha yüksək olur”.