T Ə B R İ K L Ə R

 Əzizim, Nizami müəllim, düzü,  mən sənin yeni bir sayt  açmaq fikrində olduğunu eşitmişdim. Deyim ki,  uzun illərdən sonra yenidən jurnalistlik fəaliyyətinə qayıtmağın məni heç də təəccübləndirmədi. Çünki biz uzun illərin yaxın dostu olaraq  bir- birimizin gücünə, potensialına və yaradıcılıq qabiliyyətinə yaxşı bələdik.  Sən Azərbaycan Televiziyasında işləyəndə  həmişə xoş sədanı eşitmişəm. Bilirəm ki,  sənin hazırladığın verilişlərin bir çoxu uzun illər filmotekanın fondunda  yer almışdır. “Cırtdan” Televiziya Teatrı, “ Şən dostlar”, “Əlifba” Teatrı, “ Təbiəti sevənlər” verilişləri bəlkə də indi yaşlı nəsillərin bir çoxunun yaddaşında qalmış olar.

Əziz dost, “ Facebook” səhifəsində  Pressline.az İnformasiya Portalını görəndə çox sevindim.Bu, sənin jurnalistika sahəsində  yeni bir uğurun,  oxucularımız üçün isə  yeni bir mənəvi pəncərədir. Mən həmişə sənin peşəkarlığına, sözün qədrini bilməyinə inanmışam. İndi də inanıram ki, bu sayıt  oxucularımızın, gənc nəslimizin faydalanacağı bir xəzinəyə çevriləcək. Səni ürəkdən təbrik edir,  möhkəm cansağlığı və yaradıcılıq uğurları arzulayıram.

Rafiq YUSİFOĞLU

Şair, filologiya elmləri doktoru, professor.