Alimlər xəstələrin “rəqəmsal ürəklərini” yaratdı: yeni üsul həyat qurtara bilər

Pressline.az xəbər verir ki, alimlər xəstələrin ürəklərinin o qədər dəqiq virtual modellərini – “rəqəmsal əkizlərini” yaradıb ki, bu modellər üzərində aparılan testlər həkimlərə real müalicə üsullarını daha düzgün seçməyə kömək edir.

Məlumata görə, bu texnologiya xüsusilə müalicəsi çətin olan ventrikulyar taxikardiya adlı ürək ritm pozğunluğu üçün ümidverici nəticələr göstərib. Qeyd olunur ki, bu xəstəlik qəfil ürək dayanmasının əsas səbəblərindən biridir və hər il ABŞ-da təxminən 300 min insanın ölümünə səbəb olur.

Johns Hopkins Universitetinin tədqiqatçıları tərəfindən aparılan araşdırma hələ ilkin mərhələdədir. ABŞ Qida və Dərman İdarəsi (FDA) bu “rəqəmsal əkiz” texnologiyasının cəmi 10 pasiyentin müalicəsində istifadə olunmasına icazə verib.

Mütəxəssislər bildirirlər ki, bu üsul gələcəkdə ürək xəstəliklərinin müalicəsində inqilabi dəyişikliklərə səbəb ola bilər, lakin daha geniş miqyaslı tədqiqatlara ehtiyac var.