ABŞ İran üzərində vurulan F-15-in ekipaj üzvünü xilas edib

ABŞ cənubi İran üzərində vurulan F-15 qırıcı təyyarəsinin itkin düşmüş ekipaj üzvünü xilas edib.

Pressline.az xəbər verir ki, ABŞ Prezidenti Donald Tramp sosial şəbəkədə paylaşım edərək bildirib ki, hərbçi uğurlu əməliyyat nəticəsində tapılıb və hazırda təhlükəsiz vəziyyətdədir.

Təyyarənin göyərtəsində iki ekipaj üzvü olub və onlar katapult edərək təyyarəni tərk ediblər. Onlardan biri daha əvvəl xilas edilsə də, digəri bir müddət itkin düşmüş hesab olunurdu.

İran rəsmiləri isə təyyarənin ölkənin hava hücumundan müdafiə sistemləri tərəfindən vurulduğunu açıqlayıb.

Məlumata görə, xilasetmə əməliyyatı cənubi İranda genişmiqyaslı döyüş axtarış-xilasetmə missiyası çərçivəsində həyata keçirilib.

Bildirilir ki, əməliyyat zamanı ABŞ və İran qüvvələri arasında qarşıdurma baş verib və pilot katapult zamanı yaralanmış ola bilər.

Hərbçi 24 saatdan çox dağlıq ərazidə gizlənərək sağ qalmağa çalışıb və onun yeri xüsusi xidmət orqanları tərəfindən müəyyən edilərək Pentaqona ötürülüb.