Kenterberi arxiyepiskopu Yaxın Şərqdə zorakılığa son qoyulmasına çağırış edib

Kenterberi arxiyepiskopu Pasxa xütbəsində Yaxın Şərqdə zorakılıq və dağıntıların dayandırılmasına çağırıb.

Pressline.az xəbər verir ki, İngiltərə kilsəsinin rəhbəri Sara Mallalli Kenterberi kafedralında etdiyi ilk Pasxa çıxışı zamanı ABŞ və İsrailin İrana qarşı müharibəsinin altıncı həftəsinə daxil olduğu bir vaxtda sülh üçün dua edib.

O, Yaxın Şərq və Körfəz bölgəsində yaşayan bütün insanların arzuladıqları sülh, ədalət və azadlığa qovuşmasını istədiyini bildirib.

Bu çıxış Sara Mallallinin Kenterberi arxiyepiskopu kimi vəzifəyə başlamasından iki həftə sonra baş tutub və o, çıxışında gənclik illərində bu vəzifədə olacağını heç vaxt təsəvvür etmədiyini qeyd edib.

Arxiyepiskop bildirib ki, Pasxa münasibətilə edilən dualar İsanın çarmıxa çəkildiyi və dirildiyi torpaqlara yönəlib və bu gün də bölgədə zorakılığın dayandırılması üçün çağırış edilməlidir.

Məlumata görə, fevralın 28-də ABŞ və İsrailin İrana qarşı genişmiqyaslı hücumları ilə başlayan qarşıdurma nəticəsində minlərlə insan həyatını itirib və İran da buna cavab olaraq İsrailə və ABŞ müttəfiqlərinə hücumlar həyata keçirib.