Əhməd saxlanıldığı tibb müəssisəsindən azad olunub? – RƏSMİ

Sosial şəbəkələrdə paytaxtın Xətai rayonunda 5 nəfər ailə üzvünü qətlə yetirmiş Əhməd Əhmədovun guya saxlanıldığı tibb müəssisəsindən azad edilməsi ilə bağlı yayılan xəbərlər rəsmi şəkildə təkzib olunub.

Pressline.az xəbər verir ki, Baş Prokurorluq bu məlumatların həqiqətə uyğun olmadığını bildirərək, onların cəmiyyətdə süni ajiotaj yaratmağa yönəldiyini vurğulayıb.

Qurumdan verilən açıqlamada qeyd olunub ki, Əhməd Əhmədovun törətdiyi xüsusilə ağır cinayət işi üzrə bütün hallar ibtidai istintaq zamanı hərtərəfli araşdırılıb. Toplanmış sübutlara əsasən onun cinayəti anlaqsız vəziyyətdə törətdiyi və cəmiyyət üçün təhlükəli olduğu müəyyən edilib.

Bu səbəbdən Bakı Ağır Cinayətlər Məhkəməsi-nin 10 oktyabr 2024-cü il tarixli qərarı ilə ona cəza təyin edilməyib, əvəzində ixtisaslaşmış psixiatriya müəssisəsində məcburi müalicəyə göndərilib.

Hazırda onun müalicəsinin davam etdiyi və xəstəxanadan buraxılması ilə bağlı yayılan iddiaların “cəfəngiyat” olduğu xüsusi vurğulanıb.

Baş Prokurorluq vətəndaşları təsdiqlənməmiş məlumatları yaymamağa çağıraraq, belə halların hüquqi məsuliyyət yaratdığını da xatırladıb.// Tribuna.az