Myanmanın şimal-şərqində partlayıcı maddə anbarında partlayış nəticəsində onlarla insan həlak olub

Pressline.az Yerli media və bir üsyançı qrupun verdiyi məlumata görə, Myanmanın şimal-şərqində, Çinlə sərhəd yaxınlığında baş verən partlayış nəticəsində onlarla insan həlak olub.

Bazar günü Şan əyalətinin Kaung Tat kəndində baş verən partlayışda ölənlərin dəqiq sayı hələlik məlum deyil.

Yerli xəbər saytı olan "The Irrawaddy" partlayıcı maddə anbarında baş verən partlayış nəticəsində altı uşaq da daxil olmaqla ən azı 46 nəfərin öldüyünü, 70-dən çox insanın yaralandığını bildirib . Xilasetmə işçisi "Shwe Phee Myay" xəbər agentliyinə bildirib ki, 55 nəfər ölüb.

Yerli vaxtla təxminən saat 12:30 radələrində (05:50 GMT) baş verən partlayış nəticəsində bir neçə evə ziyan dəyib və xilasetmə əməliyyatlarının davam etdiyi bildirilir.