Qızılın qiyməti 2008-ci ildən bəri ən böyük aylıq geriləmə nümayiş etdirməyə hazırlaşır

Əmtəə birjalarında qızılın qiyməti itkilərini davam etdirir və 2008-ci ilin oktyabr ayından bəri ən böyük aylıq geriləmə nümayiş etdirməyə hazırlaşır.

Pressline.az xəbər verir ki, qızılın qiymətindəki aylıq itki təxminən 13 faizə çatır. Əgər bu itiklər gün ərzində davam edərsə bu, qızılın qiymətində ardıcıl 4-cü aylıq geriləmə olacaq. Hazırda Nyu-Yorkun COMEX əmtəə birjasında qızılın bir troya unsiyası 3990-4020 dollar civarındadır.

Bundan başqa, ABŞ-İran müharibəsi səbəbindən enerji qiymətlərinin artmasının inflyasiya və faiz dərəcələrinin artacağı ilə bağlı gözləntiləri gücləndirməsi fonunda qızılın qiymətində 2024-cü ildən bəri ilk, 2013-cü ilin ikinci rübündən indiyədək isə ən böyük rüblük geriləmə qeydə alınması gözlənilir.

Analitiklərin fikrincə, qızılın qiyməti Yaxın Şərqdəki qeyri-müəyyənliyin azalması və ABŞ-də yüksək inflyasiyanı aşağı səviyyədə saxlamaq üçün uçot dərəcəsinin artırılmağa davam edəcəyi ilə bağlı gözləntilərin güclənməsi fonunda ucuzlaşır. Artan inflyasiya göstəricisi, yüksək faiz dərəcəsi ilə bağlı gözləntilər, eləcə də dolların dəyər qazanması qızılı dəstəkləyən bütün müsbət amilləri üstələyir. İnflyasiyaya qarşı hedcinq kimi qəbul edilən qızıl yüksək faiz dərəcələri mühitində faiz gəlirlərinin olmaması səbəbindən investorlar üçün cəlbediciliyini itirir. Dollar indeksi isə bir ildən çox müddət ərzində ən yüksək səviyyəsinə yüksəlib və bu da qızılı beynəlxalq alıcılar üçün daha bahalı edir.

Mütəxəssislər ilin ikinci yarısında qızılın qiymətinin 3500-4400 dollar arasında dəyişəcəyini proqnozlaşdırır. ABŞ-nin qabaqcıl investisiya banklarından olan “Goldman Sachs” və “Citigroup”un analitikləri isə qızılın bir troya unsiyasının qiymətinin 5000-5400 dollara yüksələcəyini proqnozlaşdırırdılar. Mərkəzi ofisi Avstraliyada yerləşən “ANZ Group Holdings” çoxmillətli bankçılıq və maliyyə xidmətləri şirkətinin analitiklərinə görə, qızılın qiyməti 2027-ci ilin ortalarına qədər 6000 dollara yüksələ bilər.