XALİDƏ HİCRAN
HİKMƏTLİ BEYTLƏR
4 cildlik “ HİKMƏT XƏZİNƏSİ”, 1- ci cild.
OXUCULARIMIZIN XAHİŞİ İLƏ
———————————-
ÜÇÜNCÜ HİSSƏ
Qaldırsa ucaya, sorusu olmaz,
Yendirsə ucadan, carə bulunmaz.
***
Ey insan, özünsən ağlına sahib,
Bax, kim nə aparıb, kimdən nə qalıb?
***
Gözləmə olmayan səndən istəsin,
Varınsa, ver nəsə, o istəməsin.
***
Hər nə baş verirsə, görən-bilən var,
Sən pis əməl etmə, özünə bil ar.
***
Bir kəsə eləsən bir azca pislik,
O günə yazılar qazanca “pislik”.
***
Hirsini hər zaman səbrlə ram et,
Səbirsiz işdən sən hər zaman dad et.
***
Etinasız nəzərlə süzmə birini,
Baxışın agah edər, bil, mənliyini.
***
Mənasız söhbəti heç etmə,
Özünü boşboğaz öyrətmə.
***
Tələsmirsən yeri asta – asta,
Xəmir də qıcqırsa, qalmaz tasda.
***
Qaçmaqla mənzil başına çatılsa,
Nə edərsən əgər qıçın qırılsa?
***
Gər səbir etsən, xeyir görərsən,
Səbirsiz olsan, zərər çəkərsən.
***
Səbrlə əcəl yan- yanadı,
Bax, gör hansı səndən yanadı.
***
Sən dərdliyə demə niyə ağladın?
Könlünü al, deməsin ki, danlandım.
***
Göz-gözə sataşsa, ildırım çaxar,
Sevən könüllərdə min səs çıxarar.
***
Sirri saxlamasan əgər pünhan,
Səni bəyənməz hətta öz anan.
***
Bir daş parçasıdırsa köksündə ürək,
Daha ondan nə umaq, nələr diləyək?
***
Duyğun, hissin olubsa sənin hər şeyin,
Onlar olmasa, daha sənin var nəyin?
***
Əməlin getsə nadan yanında boşa.
Arvadın pissə, onu öldürmə, boşa.
***
Canını alma ki sən bircə cücünün,
Bir də görərsən öldü kəli cütünün.
***
Tanısan Allahı rəhmli olarsan sən,
Rəhmət sahibindən rəhmət bularsan sən.
***
Bir şiddətlə-hiddətlə işə əl qoyma,
Düşmənin olsa belə, haqqını danma.
***
Bir azca gözəllik qəlbində olsa,
Sən gözəl görərsən çirkin də olsa.
***
Bu dünya bir anlıqdır, ötüb keçəcək,
Yerdə, ya göydə əcəl bizi güdəcək.
***
Yolunu düz getsən, rəhmət deyiləcək,
Nalayiq olsan, dad-fəryad ediləcək.
***
Anbarında buğdan var, zəmində tütün,
Səndən oğurlanmasa, deməzsən “tutun!”
***
Özgəyə olana sən olma ehtinasız,
Onda sən olarsan hamıdan etibarsız.
***
Zurnanı kim üfürsə, zurna səsin çıxarar,
Amma öz ahəngini zurnaçı çalsa, tapar.
***
Nə işlə məşğulsansa – zurnaçı, ya başmaqçi,
Gərək, başında olsun öz sənətinin tacı.
***
Daş daşa dəysə əgər, guruldar, səs çıxarar,
Gül-gülə dəysə, susar, ətrafa ətir saçar.
***
Yardımını elə et, kimsə duyub bilməsin,
Yüz adam öyrənincə, təkcə Allahın bilsin.
***
Gər qısqanclıqla baxsa biri səndə olana,
Əməlində doğru ol, o kəs səndən utana.
***
Mənəm-mənəm söyləyib, tikiləni sökmə sən,
O vaxt sökə bilərsən, lap gözəlin tikəsən.
***
İnsan odur – özü darda olsa da, imdada yetə,
Öz dərdini unudub, özgəyə fəryada yetə.
***
Dünya malını yığma, özünə yetsə, bəsdir,
Sənə lazım deyilsə, yığmağın da əbəsdir.
***
Yığma dünya malını qalsın nəvənə deyə,
Onsuz da qalmayacaq sonda dünya kimsəyə.
***
Uçsam, gedib görərəm, görən, cənnət-məkanı?-
Cənnəttək qəlbin olsun, hamı sevsin oranı.
***
İkiüzlü olmasan, dalınca atılmaz boğma,
Bir zəqqumun yerinə, sən yeyərsən yağlı loxma.
***
Yalana düz söyləmə, kəssələr də dilini,
Düzə düz səyləyərsən, sevərlər əməlini.
***
İnsan, qıyma heyvana, ver yeməkdən, suyundan,
Bularsan bir mərhəmət səni də yaradandan.
***
Müşkül işlər açılmaz, çarəsi Allahdandır,
Çarəsin Ondan istə, sənin inamındadır.
***
Başında nə olacaq? -Ya dərd, ya da ki, fikir,
Sən nəyi düzəldərsən? -Dünya özü dərd çəkir.
***
Fikrinin fikrin etmə, işini gör aramla,
Məşğul olmayan başda, fikir çox olar, anla.
***
Quzğun-qarğa varsa, bil ki, orada cəmdək var,
O cəmdək can yeyərdi, indi olub bir şikar.
***
Gizlidə yox bir işin, onda niyə qorxun var?
Gizlində olanları bir bilən, oxuyan var.
***
