XALİDƏ HİCRAN
HİKMƏTLİ BEYTLƏR
4 cildlik “ HİKMƏT XƏZİNƏSİ”, 1- ci cild.
ALTINCI HİSSƏ
Pərdəni çəksələr daş vicudun üstə,
Əməlin pis olsa, tüpürərlər büstə.
***
Ötüb keçsən də iri addımla,
Ülfəti kəsmə tanış- dostunla.
***
Sənə xeyirxahlığı bəyən, alqışla,
Öz xeyirxahlığını isə bağışla.
***
Qanunlara riayət etməsə qanun yazan,
Başqasının qanunu pozması olar asan.
***
Baş başdan aşağı başdan əyrisə,
Ayaq da əyilər başdan əyilsə.
***
Baş başdan aşağısa, o baş özü əyilsə,
Ayaq neyləsin, vicud ta başından əyrisǝ?
***
Taleyin beş ulduzu, kimə parlar ulduzu,
Kimə kəsildi quzu, kimə şaxta, qar-buzu.
***
Haray istəmə yaddan, sən dilə tək tanrıdan,
Versə təkər bacadan, taparsan astanadan.
***
Almazın qiyməti olmaz, əgər olmasa cilası,
At onda qiymətli olar, başına salsan cilovu.
***
Başına su tökərsən ki, olasan sən tərtəmiz,
Təmiz olmaqçın pak ola, gərək, hər əməlimiz.
***
Baş ucu, kələf ucu, dağ ucu, qılınc ucu,
Bunları tanımasan, tapmazsan bir yol ucu.
***
Bir kənddə ki kəndxuda kəmxuda olsa əgər,
O kənddə kəndxudadan razı tapılar məgər?
***
Şahin şaha layiqdi, ov olarsa əgər,
Şahin şaha şahindi, ov olmasa məgər.
***
Darğalar dardan asılsa özü əgər,
Bir darğa darğa olmaq istərdi məgər?
***
Bir başı kəssə adam, cəllad adlanır əgər,
Cəlladı cəllad edən bir əmr deyil məgər?
***
Hər hikmətin içində gizlənsə 1001 məna,
İki 1-i götürsək, sıfırlarda nə məna?
***
Qansaydı hər edilən eyhamı insan,
Qanmazı başa salmaq olardı asan.
***
-Fəhmin, yoxsa əhdin, – hansı gerçək olar?
-Kimin fəhmi gerçək olar, kiminsə əhdi puç olar.
***
Bəsləsən, açacaq dibcəkdə çiçək,
Zəhmətsiz nə əksən sən gözünü çək.
***
Damazlıq olmayacaq bəslənməyən bir qoçdan,
Namuslu düşməndən yox, qorun namussuz dostdan.
***
Dedi-qodu sevənlə dost olma sən əzəldən,
Yaxan qurtula biməz həmən zəhlətökəndən.
***
Olmasa da göz nurun, bəs edəcək qəlb nurun,
Səsindən anlayarsan insanın acın-toxun.
***
Sarıbdı dünyanı haqsızlıq, cəhalət,
Yox olur insanda insaniyyət, qeyrət.
***
Axarsa gözlərindən damcı- damcı billur su,
Qəlbinin ahıdı ki, elə təmizdi o su.
***
Olsa da qəlb evinin hər güncündə min bir dərd,
Mən bilərəm onları hamısını şəkər, qənd.
***
Olmaya, olasan sən də bircə vasvası,
Öz əlindən ürpənib, hey yuyarsan tası.
***
Dərdi dərd bilməsən daha da yaxşı,
Bil ki, dərd tanıyar dərd çəkən başı,
***
Qeyrət gördüm o kəsdə ki, saldı aləmi heyrətə,
Elə biqeyrət gördüm ki, saldı qeyrəti heyrətə.
***
Otursa da süfrənin baş ucunda bir qanmaz,
Harada oturduğun onsuz da yenə qanmaz.
***
Torpaq insan eybin örtmür ölənə qədər,
Pul örtür çoxunun eybin bu günə qədər.
***
Divardakı çatları yağış yuyar, seyrələr,
İnsandakı eyiblər pul artdıqca örtülər.
***
Göz toxluğu olmasa başladığın dostluqda,
Sənin əlin qalacaq havadakı boşluqda.
***
Düz bölünməsə dövlət, heç qardaşlıq da olmaz,
Hətta ər-arvad belə birlikdə xoş yaşamaz.
***
İki dost arasında bil ki, olar üç alma,
Birin özünə götür, araya tamah salma.
***
Bir qarına sahibik, bir də ki, başa-gözə,
Baş fikrini deyəndə, gərək, qarın da dözə.
***
Dünyanı öz nəfsinə nə qədər qurban versən,
Gözüac gedəcəksən, nə qədər yığıb yesən.
***
Sən davransan hər kəsə bir xeyirxah insan tək,
Bil ki, darda qalanlar sənə yaxın gələcək.
***
Zərrə qədər olsa da qəlbindəki paxıllıq,
Ürəyinə verəcək batman-batman ağırlıq.
***
Gözlər çox qamaşsa da gözəl geyim-keçimə,
Nə parıltı, nə geyim, bil ki, qalmaz heç kimə.
***
Axmasın gözlərindən hüzün-kədər selləri,
Uca dağ zirvələri görər tufan yelləri.
***
Kim ki, kimin ocağın qan çiləyib söndürər,
Ocaq söndürənin də ocağı külə dönər.
***
Ölümqabağı hər kəs gəlsə də ağıla,
Bilməz kimi özünə köməyə çağıra.
***
Ürək qəmgin, sən tap təmkin,
Tanımırsan, etmə ərkin.
***
Sən hər sözə olma həməncə qəmgin,
Kim mülayim deyər, kimi də kəskin
——–
