XALİDƏ HİCRAN
HİKMƏTLİ BEYTLƏR
4 cildlik “ HİKMƏT XƏZİNƏSİ”, 1- ci cild.
SƏKKİZİNCİ HİSSƏ
Qatil, nədir?- qəzəb, hirs, səbirsizlik, ya da ki, nəfs,
Bunlar olmasa, olmaz dünyada qatil, tək bir kəs.
***
Hiddət-qəzzəb olmasın ömründə bir an da belə,
O da olmasa, nə gözəl, üzün gözün hey gülə.
***
Dağda-daşda yerisən də, çalış ki, büdrəməyəsən,
Günahı yollarda deyil, gərək, ağlında görəsən.
***
Qəmzələrin mənə bəsdir, gül, ey gözəl qəmzə satan,
Daşı tərəziyə düz qoy, aldanmasın qəmzə alan.
***
Bəzən əsl sənətkara edilər çox həqarət,
İnsan xilqəti budur-paxıl eyləməz hörmət.
***
Taqətim yox bu canda, çoxdur taqətsiz bu cahanda.
Fəqət insan zalimləşir, demə taqət hansı canda?
***
Vəsf olunub gözəlliyin səndən öncə mələkdə,
Sən mələyin kölgəsisən, ey gözəl inan, yerdə.
***
İdrak nuru səndə olsun, daim yaşasın səndə,
Tərk eləsə, demək, yoxam, idrak nuru yox məndə.
***
Kim deyir ki, bəxtiyaram? Oxşayıram bəxti-yara?
Fələk ağlatdısa, demək, mən olmuşam bəxti qara.
***
Sən beşikdə dil açıb, danışmadın İsa kimi,
Beşiyin var, sahib çıx, yaddan çıxarma dilini.
***
Dostla ayrılsan vida et, sonra ayrıl dostundan,
Bəlkə sabah görəməzsən, gər dünyadan ayrılsan.
***
Duzsuz bir söz söyləyib, aranı qatma qəsdən,
Bu, özünə qəsd olar, heç özün də bilməzsən.
***
Bağrım yandı ağlamaqdan, ədaləti tapmamaqdan,
Gördüm deyən olmasa da, heç qalmadım axtarmaqdan.
***
Tələyə düşdü ceyran, kim alar onu dardan?
“Balası gözlər” deyb, qurtaracaq Yaradan.
***
Seyr edirəm dünyanı, çünki mən bir rəssamam,
Çox dərindən dalanda şeir də yazır fırçam.
***
Əgər qəmi, kədəri ürəyinə buraxsan,
Kədər silər qəlbindən səni, həm də həyatdan.
***
Hüdudu görünməyir, uczus- bucaqsız kainat,
Bax bu sonsuz göylərə, əlini ümidə uzat.
***
Həddini sən heç aşma, həddini bil hər zaman,
Bəndin də bir həddi var, aşsa, sel edər tüğyan.
***
Kimsəsiz bir qocaya yardım et, dili qafil,
Onun da sahibi var- hər şeyi görür, bilir.
***
Hədər həyat yaşama, hədər olmasın günün,
Sonunda ayılanda, demə “zay oldu ömrüm”.
****
Nübar gətirən ağac bar verməyə hazırsa,
Gələn il cox bar verər, qışda ayaz vurmasa.
***
Səmimi ol insanlarla, müəmmalı yaşama,
Sadəlik böyük gözəllik, ondan sən uzaqlaşma.
***
Bəla gəlsə qapına, döz, bəlaya güc gəl sən,
Bəla olar başına bəlalara dözməsən.
***
Pis əməlli dost ilə otur- dur eyləmə sən,
Bil, sədəmə toxunar sənə də əməlindən.
***
Dost seçəndə namüslu, əməlisaleh olsun,
Sənin də əməllərinə onun nurundan dolsun
***
Sənə pis rəftar edənə kəc rəftar heç etmə sən,
Görüb sənin əməlini, utansın etdiyindən.
***
Çıraqban ol, işıq sal, könüllərə özün sən,
Səninlə dost olmağa alışan qəlb görərsən.
***
Nə istəsə eyəyər, insan da yolun azanda,
Süd də coşub həddin aşsa, qalmaz damcı qazanda.
Şəfqətini əsirgəmə ehtiyacı olandan sən,
Sənə də şəfqəti olar, şəfqətini bəyənəndən.
***
Qatili kəndirdən asmaq heç də qurtuluş deyil,
Əzabları kəndirdən as, nə dərd olsun, nə qatil.
***
Şəfa olsun rəftarın, sözlərin xəstələrə,
Dərman tapmasalar da, dərman ol ürəklərə.
***
Toy- büsatdan qalma heç, yara sən xeyir-şərə,
Xeyir- şər sahibinin gözü baxar hər yerə.
***
Tarimar olacaq əgər, bir tüfaq yıxan olsa.
Özüdə alar cavabın, gər dağıdıb tufaqsa.
***
Nəsibin olsun gözəllik, sadəlik, təmizlik,
Bunlar olmasa, olarmı həqiqi gözəllik?
***
Fəlakətdən qaçmaq olmur, əgər əmr göydənsə,
Bacar, zəlzələni durdur, yolun bilərsənsə.
***
Saxlayırıq, bər-bəzəklə ələnin məzarını,
Qayıtsa, bəyənərdi görən, bu yadigarını?
***
Ovun aslan ovu olsun, çaqqal şikarı olmasın,
Özün ovla, qoy şir adın, gedəndən sonra da qalsın.
****
Fərağında bir gözəlin yanma, əyan et bilsin,
Cavabı hə, ya yox olar, ürək də işin bilsin.
***
Səfərə çıxan zaman götürmə çox azuqə,
Sənə verən verəcək, sən yalvar o xaliqə.
***
Rəqibin olsa əgər, sənətində bil ki sən,
Ən yaxşıları seçib, gərək rəqib biləsən.
***
Kənar demə qonşuya, yad olsa da yaxın ol,
Eyni bez qırağısan – o insan, sən adam ol.
***
Biçarəyəm söyləmə dərdin əlində qalsan,
Aç əlini tanrıya, nicatını taparsan. s
